اولا : بنعتذر بشدة عن انقطاعنا لمدة طويلة عن المدونة الفترة اللي فاتت
و لذلك أسباب هنقولها لكوا دلوقتي ..
ثانيا : بنشكر جداااا كل اللي سألوا عننا في فترة غيابنا , بجد ربنا يكرمكوا و ميحرمناش منكوا , لأنكو فعلا حسستونا ان لينا اخوات بيسألوا عننا في غيابنا ..
أما ثالثا ... فغيابنا الطويل فوت علينا اننا نبارك بالنجاح للي نجحوا و نهني برمضان و العيد , بس احنا منسيناكوش في دعواتنا في الشهر الكريم
و خصوصا كل اللي دايما كانوا بيدعولنا و بيسألوا علينا ..
نرجع بقي لأولا ً .. و سبب غيابنا الطويل ..
عقدنا جلسة عمل مغلقة مطولة نبحث و ننقب عن مواضيع جديدة للبلوج و تكون فيها إضافة جديدة .. يعني و لا نكرر نفسنا و لا نكرر الآخرين .. حسينا اننا عايزين نقعد معاكوا كلكوا و نتكلم و نتناقش في اهتماماتنا و في ايه الجديد اللي عايزين نعرفه ؟؟ و ايه اللي ممكن نضيفه لبعض ؟؟
و جت لنا فكرة عبقرية ..
ليه منتخطاش البلوج او المدونة كمرحلة و نعمل منتدي ...
يكون فيه تواصل بينا و بين بعض ,
مش بس احنا نكتب و الناس تعلق علي كلامنا ..
كلنا نتكلم و كلنا نسمع بعض و كلنا نعلق علي كلام بعض و نستفيد ..
ايه رأيكوا في الفكرة دي ؟؟
لو الفكرة عجبتكوا يبقي نقابلكوا في منتدي ركــّـز !
نوع مش مركز في حاجة خالص .. مش عايز يركز و مكتفي بأنه عايش و خلاص ..
و نوع بيوقف نفسه عن التركيز بكيفه و طبعا الطرق كتير علشان الإنسان يتوقف عن التركيز ..
و النوع التالت النوع المركـّـز .. في كل حاجة , في دنيته و في دينه و في أخرته و في مجتمعه ..
في المنتدي ده سواء كنت مركز او عايز تبقي مركز او عايز حد يساعدك تركز .. هنساعد بعض نركز علي المهم و المفيد في اليومين اللي احنا عايشينهم في الدنيا ..
و علي فكرة التركيز ده اهم حاجة مطلوبة مننا في الدنيا و علشان كده ربنا حرّم الحاجات اللي بتخلي الإنسان يفقد تركيزه ..
عرفتوا بقي قد ايه التركيز ده حاجة مهمة !!
اذا كنتوا اقتنعتوا بالفكرة دي فمرحبا بيكوا مركـّز و مركـّزة في منتدي ركـّـز
اما بالنسبة للبلوج فأحنا مش هنقفله , لكن مش هنضيف ليه إلا اللي يستحق انه يكون إضافة ..
و زياراتنا لبلوجاتكوا هتبقي زي ما هي إن شاء الله .. لأننا منقدرش نستغني عن متابعة بلوجاتكوا ..
و علي فكرة كمان
احنا في منتدي ركز هنناقش كل جديد في المدونات و اخبار المدونين و جديدهم .. و نلقي الضوء علي الحاجات القيمة اللي بتكتبوها في المدونات , و تستحق ان احنا نقراها مرة و اتنين و تلاتة
ادعولنا انه يكون مجال للإستفادة لينا كلنا , و طبعا من غير ما أقول اهلا بكل اللي بتحبوهم و تحبوا انهم يكونوا معانا في المنتدي
من كام يوم ربنا هدانا أخيرا و قررنا نروق مكاتبنا اللى حالها يصعب على الكافر من يوم ما اخدنا الاجازة ..
و قعدنا نروق في الكتب و الملازم و ورق المذاكرة ,
و أكتشفنا في وسط الورق حاجة كنا ناسينها احنا الاتنين .
ان احنا اوقات في المحاضرات الحالكة الرهيبة
لما كانت حالتنا بتبقى وصلت لأسوأ ما يكون و خصوصا في الأيام اللى بتبقى ايام عجيبة كدة من أولها ..
أكتشفنا ان احنا في الأيام اللى من النوع ده اثناءالمحاضرة, بنفتح اى كشكول قدامنا و نبتدي نكتب جمل و نرد على بعض عشان نكسر حالة الملل اللى احنا فيها و خصوصا لما يكون الكلام اللى بيتقال out of pointأو ملوش معني !
و طبعا اكتشفنا من اللى قريناه اننا كنا بنبقى مهيسين على الآخر
لدرجة أن احنا بنكتب صفحات طويلةكلام يهلك الضحك
قعدنا نقراه و احنا مش مصدقين ان احنا اللى كاتبينه
أوقات يكون نقد لكلام الدكتور و أوقات يكون على مثلا حاجة شايفينها و عايزين نعلق عليها سوا ..
أما اعجب حاجة كتبناها من النوع ده ..
فكانت في صيغة زجل عجيب الهيئة مريب القافية !!!!!!!
و طبعا واضح من الحالة اللى كنا فيها أنها كانت محاضرة drama
- ربنا ما يوري حد ابدا - اللى توصلنا ان احنا نكتب في صيغة قصيدة
و الدكتور كانت ..................
ربنا يكرم الجميع و يسامحنا جميعا ...
عموما احنا حطينا الورقة زي ما هيا من غير تعديل و لا تنقيح ..
علشان تحسوا بالحالة اللى كنا فيها ..
و لا زلنا بنروق في المكاتب و بنكتشف حاجات غريبة و ما خفي كان اعظم ......
و إليكم تحفتنا الزجلية الشعرية ال ..... ما اقدرش اقرر هي كانت شعرية و لا لسان عصفور
لما تقروا انتوا قرروا ....
ملحوظة : برضو اللون الأحمر بونجو و الموف يوكي !
قررنا دخول الألسن ... لرفعة صيتها
و لم لا و قد ... حصّلنا مجموعها
ثمار دعاء أم ... و دروس سئمتها
فلولاهما لما فلحت ... فى الثانوية عامها
حسناَ فتلك أية ... يصعب وصفها
أو قولي مشيئة الله ... محالة أعتراضها
أظننتها نعمة !! ... بل نقمة جهلتها
حتى انجلى الوهم ... و وطئنا أرضها
عشرات الخلق تسعى ... و تزحم حرمها
و ليس منهم عاقل ... يتوق لعلمها
و دكتورا لا يأتي ... إلى السكاشن كلها
و إن أتى فبعد ... ساعتين اقلها
و ماذا إذا تخلف .. عن موعد بدأها
الا ترينه قد كروت ... و ألغي نصفها !
أجديد على كلية ... بمثل قدرها ؟؟
أو حتي احدث فرقا ... لأغلب صفها ؟
تشرق شمس جديدة ... فوق سقفها
و قد أختلط فيها ... كارها و محبها
لو تعرف الشمس حقاً ... لتبكي لحالها
بعير تحمل فوق ... ظهورا ً أسفارها
حلم كلية قمة ... تعس اهلها !!
فما بالك بالقاع ... يا نابغة عصرها
أجيبي انت صاحبة ... الفكرة و رأسها
ألست القائلة الألسن فى " السى فى " ... تزيد قدرها "؟؟
عدنا الحمد لله للتدوين من جديد و ان شاء الله نكتب المزيد و المزيد ..
التدوينة المرة دي مش تدوينة بالظبط .. انما هي مجرد تفسير صغير لمعني اسم المدونة و اللي هو معاني اسامينا علشان ناس كتير سألونا عن سر اسمائنا المستعارة و اللي سمينا بيها المدونة و هي
Bongo & Yuki
الموضوع ابتدا من زمااان اوووي و كنا وقتها – و للأسف طبعا – لسه اطفال في ابتدائي و بنحب الشخصيات الكرتونية – عادي يعني زي كل الأطفال المتخلفين اللي في سننا وقتها – و كان في شخصيتين اسمهم – بونجو و يوكي – و لأنهم بيبتدوا بنفس اسمائنا , فأخترنا الأسمين دول و كنا بننادي بعض بيهم ..
و للأسف بردو فضلوا معانا لغاية ما كبرنا ..
و لما جينا نفكر في اسم للمدونة , ملقيناش اسم اوقع من كده ..
و قبل اتخاد الاسماء طبعا جري البحث عن معاني الكلمات
و اكتشفنا ان معني بونجو هو : نوع من انواع الغزلان الجميلة ...
اما يوكي فمعناها بالياباني أميرة او شجاعة !!
و لما لقينا معاني الاسماء ماشيه يعني , فقلنا يبقي فعلا هما دول الاسمين اللي احنا نحس بيهم بطفولتنا و هو ده الانطباع اللي عايزين نحطه في المدونة ..
و المفارقة الغريبة في الاسمين دول ان اللي بيقراهم مش بيعرف
دول اسماء ولد و لا بنت , و دي صفة مشتركة في الأسمين بالصدفة !
و ده احيانا بيكون له فايدة ان حد يتعرف علي فكرك و يقيمه قبل ما يعرف ده فكر رجل ام امرأه ..
و علي فكرة هي دي النظرية اللي خلت كتير من الأديبات زمان بيكتبوا بأسماء مستعارة لرجال ,
عشان فكرهم يقيم اولا و ليس من خلال فكرة مسبقة عن فكر المرأه ..
احنا مقصدناش ده علي فكرة خالص بس هي جت كده ..
المهم ان هما رغم كل شئ اسمين خفاف علي اللسان و بيلاقوا قبول و الحمد لله
و بعدين سمينا نفسنا بيهم و اتعرفنا بيهم خلاص .. هنعمل ايه بقي !!
عاملين زي لما بيكون في شخص حد بيُطلق عليه اسم ممكن يكون غريب و احيانا مضحك بس بيتعرف بيه , فيحبه و يتمسك بيه و يفضل معاه ..
عموما , نرجع لموضوعنا , احنا بنعتذر عن التأخير و عندنا عذر لا يمكن تجاهله – الأمتحانات – يعني مضطرين تسامحونا و متزعلوش مننا ..
و احنا ورانا تاجات كتير كمان عايزين نجاوبها و بنشكر كل اللي بعتوها لنا قبل ما نجاوبهم .. و ان شاء الله هنجاوب عليهم في اقرب وقت ..
و اخيرا هنعرف ندخل مدوناتكوا الرائعة و تقرا كل جديد فيها , لأننا في الأجاااااااااااازة !!
مؤشر صغير مثل مؤشر الحرارة , أعلقة على الدولاب أو حتى على الثلاجة .. أرى نفسي فيه .. أين أنا الآن .. و أين بقية الناس مني !
لا أعلم إن كانت هذه أمنيتي وحدي أم هو حلم لكل البشر و لكنني أتمنى أن امتلك مثل هذا المؤشر ..
مثل تلميذ يجتهد أحياناً و يلعب أحياناً و أثناء الإمتحان لا يعلم إن كانت إجابته صحيحة أم لا ..
لكنه يتمنى أن يعرف ما إذا كان ناجحاً أم لا
و هل هذه الإجابة كافية أم يزيد عليها ؟
هل ستحسب تلك الأجابة بالدرجة الكاملة ؟
و هل أجاب الآخرون مثلي أم أفضل أم دون ذلك ؟؟
ليتني أملك هذا الشئ !
أعلم أنها أمنية مستحيلة المنال .. الغيب عند الله و هو وحده أعلم بدرجاتنا و تقديرنا النهائي , و لكنني أحياناً ما أشعر إني وحدي .. أخاف أن تكون ورقتي بيضاء خاوية على عروشها بينما يكد الأخرين في ملئ أوراق فلوسكاب A4 كاملة في أجاباتهم ..
فيسبقني الرحال و أترك وحدي خارج الأبواب !
يارب أسترها معايا !
ربما في كل أمتحانات حياتي كان هذا هو أسلوب المذاكرة .. آخر يومين و بتعدي .. لكن هذا الأمتحان هو الأهم و الوحيد الذي أسعى لنيل تقدير الأمتياز فيه ..
فإن كنت سأقضي حياتي كلها بدون مذاكرة أبداً و لو لمرة في حياتي فلأجعلها المرة الأولى و الوحيدة التي سأذاكر فيها من بدري و أدخل الأمتحان تمام التمام و لا ينقصني إلا رحمة الله التي لا ينفع عمل بدونها ..
يارب ساعدني أذاكر في أهم إمتحان , إمتحان الحياة من بدري بدري و يعدي على خير ...
كلنا بنحلم .. أكيد و اللي ما بيحلمش أثناء النوم بيعتبره الأطباء النفسيين مجنون ! و سيبكوا من كل ما قيل عن تفسيرات الاحلام لأنه موضوع كلنا قريناه كتير , و هو أكيد صح لأنه ذكر في القرآن ان الاحلام احيانا بتكون رؤي و لها تفسير طبعا , و ان الرسول ( ص ) كان بيسأل الصحابه عن الرؤي اللي حلموا بيها , و ده معناه ان الرؤي شيء حقيقي و طبعا كلنا عارفين ان كل المفسرين و الأطباء و كل اللي تناولوا الموضوع أجمعوا أن الاحلام 3 أنواع :
1 – رؤي من الله و لها تفسير أما بشارة او إنذار ,
2 – كوابيس محزنة يتسبب بها الشيطان للإنسان ,
3 – أضغاث احلام و هي ما نطلق عليها الاحلام و ليس الرؤي .
و الاحلام هي التي تكون احيانا غريبة أو مضحكة او مخيفة و غالبا ما تكون بسبب القلق من شيء زي احلام الامتحانات و اللي اكيد مفيش حد فينا محلمش بيها و اللي بتبقي قبل أو ليلة الامتحان ,
و الواحد يحلم انه بيمتحن و مش فاكر الإجابة أو مش عارف يشوف ورقة الاسئلةاو انها مكتوبة بلغة مش عارف يقراها أو الوقت خلص و بيسحبوا منه الورقة و هو لسه مخلصش ... يعني و غيره
أقصد الاحلام اللي بنحلمها تحت تأثير حاجه مخوفانا او قلقانا او حاجه حصلت لنا في اليوم ده او اكله تقيلة قبل النوم ,
و هي دي اللي بنتكلم عنها هنا ..
و انا هبتدي بنفسي و احكي لكم أغرب حلم حلمته و كل واحد فيكوا يحكيلنا اغرب حلم حلمه و بكرر تاني لا أقصد الرؤي الجامده و اللي بتكون فضل من الله و اللي طبعا محدش فينا مفروض يحكيها علي الملأ لأنه مكروه ,,
اما الحلم العجيب بتاعي هو كان ...
خيراللهم اجعله خير و اظنه حلم عجب فعلا
و هو اني كنت في الحلم راجل عجوز جدا !!!
و المفروض اني عايش في زمن قديم اوووي و ان الزمن او البلد اللي انا فيه متحرمه فيها الكتابه بأمر من الحاكم !!
و انا راجل من العلماء الجهابذة و صعبان عليا اوي ان حد يحرمني من الكتابة و طول الحلم بخبي الورق و الأحبار و بهربها علشان اكتب في السر و ادون العلم اللي عندي ..
و كنت متأثرة جداا و بقول ان الاجيال اللي هتيجي بعدنا مش هيعرفوا قيمة انهم يقدروا يكتبوا وقت ما هم عايزين و مش محتاجين يخبّوا الأوراق و الأحبار زينّا و يمكن ميسمعوش عننا و لا يعرفوا المعاناه اللي احنا عيشناها علشان نقدر نكتب و يمكن ما يعرفوش قيمة الكتابة زينا !
و الله الحلم ده كنت متأثرة فيه جداا و واخدة الموضوع جد و عيب عليكم انكم بتضحكوا عليّا دلوقتي !!!
